【收市閒情】連Bill Gates都愛飲！珍奶龍頭「貢茶」早已成英資公司－千頌C

冇錯，佢哋係飲珍珠奶茶，仲要係大家都識嘅「貢茶」。

依家香港有海量茶飲店，但想當年2009年「貢茶」攻港，算係最早進軍香港嘅台式手搖飲品店之一。貢茶嘅出現，可以話奠定珍珠奶茶喺香港人心目中地位，有一段時間每間貢茶門口都會大排長龍，2012年全港有46間分店，呢個係咪高峰期，我未搵到資料去肯定，但印象中係開到成行成市，可以話係名噪一時。

不過隨住越來越多品牌打香港市場，貢茶已經唔再係龍頭品牌。老實講，依家揀珍珠奶茶飲，我都唔會揀佢。不過，當你以為品牌要沒落，其實佢香港仲有成30間分店；而佢真正要打嘅市場，亦似乎唔係早已充斥台式飲品店嘅港、台，而係走出國際。

睇返貢茶發展史，香港對貢茶來講，只係為走出國際試水溫。當年香港成功之後，12年就入埋韓國、澳洲，之後陸續擴張業務至世界向各地，包括美國、墨西哥、加拿大……等地，目前貢茶已擴展至全球23個地區，開設超過2000家門市。其中韓國分店就有700幾間、日本破百間、菲律賓150間、澳洲100間，至於發源地台灣，就只有31間。

能夠喺國際大紅大紫，其中一個好重要嘅原因係，貢茶早就已經唔係台灣公司。2017年，韓國貢茶透過私募UCK Partners（前稱Unison Capital），反手買返台灣母公司貢茶國際七成股權。兩年後，即係2019年，UCK Partners再將手上股份，賣俾美國私募基金TA Associates。據報道，交易作價2.58億美元，相當於約20億港元，單係呢一單刁，UCK Partners就賺超過5倍利潤。之後就已經係疫情啦，所以喺UCK Partners角度睇，真係靚賣。

至於另外三成股權呢，就喺同年，由英國公司GC GROUP BIDCO買咗，然後好快地呢間英國公司就改名做Gong Cha Global，而貢茶總部就正式落戶英國倫敦。咁所以點解連Bill Gates都會識貢茶，咁當然係有人仲介紹佢飲啦，呢個人就係「尚氣」劉思慕。據報道，貢茶去年收入1809億韓元，即係10億港元；operating profit 168億韓元，約1億港元。

至於貢茶近年有咩動作呢，有傳過想上年IPO，仲話估值至少6億美元（約46.8億港元），但依家就好明顯冇搞到啦；最新，今個星期有韓國傳媒就報道，大股東TA Associates已經搵咗投行，準備將貢茶賣返出去，但今次估值跌咗，話預計係超過4.4億美金（約35億港元）。

其實珍珠奶茶上市都唔係咩新鮮事，香港第一隻上市珍珠奶茶股，係台灣天仁茗茶香港經營商賓仕國際（1705），股價都唔使點睇，都冇咩成交；兩年前又有奈雪的茶（2150）。早幾個月，內地茶百道都交咗表香港上市，另外，彭博引消息報道，至少仲有5間內地珍珠奶茶商，排隊去香港或美國（IPO），包括蜜雪冰城、滬上阿姨、購的蜜、霸王茶姬及新時沏。

講到呢度，其實覺得幾唏噓，以前東南亞一啲新嘅品牌，如果想衝出國際，好多時都會揀香港作為第一個落腳點，當佢係「試金石」或者係「修羅場」，貪香港人口夠密集，又肯試新嘢，得定唔得好快知。就好似貢茶咁，到依家睇佢網頁嘅公司介紹，都明顯見到佢哋視香港市場嘅成功，為一個重要里程碑。不過Covid之後，香港對外資吸引力明顯減退，以後仲會唔會有咁多外資，肯將衝出國際嘅第一份賭注放喺香港？認真地講，係擔心嘅。

（以上評論為作者個人意見，並不代表本網站立場。投資者須注意投資涉及風險，價格可升可跌甚至變成毫無價值。投資者在作出任何投資決定前，應詳細閱讀有關之風險披露聲明及相關文件。）