移民英國哪裡是最佳落腳點？租屋買樓前4個必須考慮的因素｜WARRINGTON、SOLIHULL、KINGSTON定SUTTON好？

陸陸續續仍然有香港朋友打算响未來一、兩年移居英國，佢哋同我哋當初決定走既時候情況唔同，當時我哋心裡面冇太多顧慮，只係心口掛個勇字，憑直覺揀定落腳點就出發。而家佢哋有好多時間準備，接收咗海量資訊，受到唔同朋友既影響，心裡面自然十五十六，容易搖擺不定。

當然呢個問題冇一個最佳答案，因為每個人既個性不同、喜好不同、經濟能力同家庭環境不同，一千個家庭可以有一千個答案。不過移民咗兩年，認識咗住響英國大江南北既香港人朋友，都可以概括地講吓要選擇自己響英國既第一個落腳點，有啲咩嘢要考慮。

首先，當然都係最老土但係最實際既一點，你最熟既親朋戚友響邊落腳，你最好咪響邊度落腳囉。當你啱啱到埗，人生路不熟，親戚朋友就係你既水泡，而且最好有幾近住幾近，因為英國地大物博，就算住同一個城巿有時大家都會相距成個鐘車程，如果唔係真係住得近，好難真正做到互相照應。

加上呢度生活相對枯燥，休息日大家習慣聚會圍爐，住得太遠就會增加咗見面既阻力同難度。當然，響選擇朋友方面都要注意，本來相熟既朋友未必代表會好願意照應你，我都有聽過一啲移英朋友之間因各種原因反目既例子。呢一點就要你靠自己好好選揀喇。

第二，當然係最現實既個人經濟條件。你係拎住幾十萬、幾百萬，定幾千萬港紙現金，絕對影響你響邊度落腳既決定。雖然話有錢人多數選擇英格蘭南部同倫敦，窮人多數選擇英格蘭北部甚至蘇格蘭，但現實又唔一定，因為住倫敦既人好多都係因為要返工先至迫住住倫敦，好多真正有錢人因為要住大宅、住古堡，要有湖光山色，先至選擇住到冇雷公咁遠。

坦白講，如果我手頭現今有限，的確會傾向選擇北部或蘇格蘭等城巿如曼城、利物浦、列斯、格拉斯哥，因為拎住同一筆錢响北面真係可以享受到較好既居住及生活水平；

如果我真係幾千萬未開頭，我就會揀住DEVON、CORNWALL、SURREY、KENT入面既小鎮大屋，閒時調整農務，賞花觀鳥，想SHOPPING玩樂去附近OUTLET，或者開車直入倫敦，咁先至對得住自己。

第三，家庭狀況都會帶來決定性既影響。無論係邊個城巿，大部份人都會傾開避開住巿中心地區，因為巿中心通常租金貴、環境嘈雜、治安差。揀住巿中心既多數都係單身少男少女，因為貪佢返工方便，遇上約會、夜浦都返到屋企，就好似有啲香港人唔介意捱貴租住蘭桂坊、SOHO區既STUDIO FLAT一樣。其實倫敦既STUDIO FLAT同香港樣咁貴，好多單身男女負擔唔起STUDIO FLAT，一樣都要住SHARED FLAT或者劏房。

所以大部分香港或者LOCAL既中產家庭，都會揀住大城巿既周邊地區，因為租金相對便宜，居住空間比較充裕，住宅附近較多公園、綠地，同適合家庭玩樂既好去處，而且經鐵路網入城巿返工都唔算太困難。我識住得距離返工地點最遠既LOCAL，住READING返倫敦MAYFAIR，距離40幾英里，遠過天水圍出柴灣，雖然一星期返足五日，但其實每程只需一個鐘頭。另外由於疫情後好多公司都唔需要員工返足五日，所以鼓勵咗唔少人決定再搬遠啲再住好啲。

至於大城巿周邊有咩地方好住呢？大家不妨參考吓一份移英港人居住地既報告，報告排列咗英國不同地點每1,000名人口中香港人所佔數目，結果是撇除倫敦巿中心之外，最多港人居住既地點(按數字，不是比例)，順次序為WARRINGTON、SOLIHULL、KINGSTON UPON THAMES、SUTTON、SALFORD、TRAFFORD及READING，其中WARRINGTON、SALFORD及TRAFFORD均在曼城周邊，SOLIHULL在伯明翰城周邊，KINGSTON UPON THAMES同SUTTON就響倫敦周邊。

不難估計，比較多香港人選擇落腳既以上地區，都係整體生活環境上比較理想既地區，所以呢個排名對於未有非常具體想法既你，應該有一定參考價值。

當然，要決定最終落腳點，仲有好多唔同既因素考慮，例如就業條件、學校、氣候、環境、種族等等，不過呢啲因素既重要性就更加因人而異，為免太長氣就唯有下次有機會再講。總括而言，為了易於適應，嚟到英國既一個落腳點，不坊選擇一個較多相熟朋友、整體條件較理想既地區。一年半載當熟習了當地環境後，才按個人喜好和能力搬到更加適合自己的地方。呢個應該係幫自己融入本地生活既一個好方法。