【英國移民生活分享】英國生活最難捱嘅係咩？係冬天！到底要如何度過？

去到12月、1月，下晝3點已經日落，4點鐘個天黑晒，如果遇上天陰落雨，成個人個Mood都唔會好得去邊。加上呢度無論巿區郊區啲街燈都唔太光(可能為咗減少光污染)，巴士火車班次又疏，呢啲時候如果一個人放工放學，咁啱經過啲僻靜或者治安較差嘅地方，都咪話唔驚。

我哋响英國嘅香港人朋友，好多都係一家大細一齊移民，但仍然都有啲係一個單身男仔或者女仔自己獨居。呢啲時間最難頂嘅就係寂寞難耐，因為一個人離開咗自己最熟悉嘅親人朋友嚟到他鄉，要適應當地新生活已經唔容易，唔係個個都可以迅速建立到新嘅人際網絡同社交圈子。漫長冬天，當踫上普天同慶嘅節日，响社交媒體見到其他人成雙成對，所有負面情緒就會湧晒上嚟。

就算係葉師傅天生性格咁樂觀，屋企人又齊齊整整，上年冬天嘅時候都竟然發現自己都有少少Winter depression。因為我哋屋企係Flat，得一面有窗，而且向北，冬天陽光照入屋企嘅時間好短，加上葉師傅本身在家工作，平日較少外出活動，少見太陽，吸收唔夠維他命E，缺乏運動，又導致胺多酚水平下降，不知不覺間，竟然令到自己情緒變得暴躁，心情起伏不定。初時唔知道情緒同環境、氣候有關，只係覺得無可奈何、莫名其妙，後來發現身邊好幾個朋友不約而同都有差唔多嘅徵狀，先至決定要認真去看待問題。

情緒問題如果得唔到應有重視，可以惡化為好嚴重嘅後果。今年年初有一個27歲嘅香港女仔，碩士畢業，响倫敦一間慈善機構工作，因為生活壓力、情緒困擾，同埋種種原因，最終不幸地選擇輕生，相當令人婉惜。一個人响情緒最低落嘅時候，如果身邊有一個人可以傾訴，可以陪伴，好大機會可以避免不幸嘅事情發生。所以一個人嚟到外地，最重要係放開懷抱，多認識新朋友，拓闊自己社交圈子，响必要時先至可以搵到朋友幫忙。

要涯過漫長嘅英國冬天，除咗同朋友圍爐取暖，自己一個人都可以踏出第一步，通過改變生活習慣，改善身體嘅荷爾蒙分泌，借此驅趕負面情緒。一啲好簡單嘅方法，例如响好天時外出晒太陽，响草地野餐同睇書，多做有益身心嘅運動，响努力工作之後為自己安排私人獎勵，俾自己睇喜歡嘅電影，聽自己喜歡嘅音樂，甚是俾自己狂Loop偶像嘅Instagram、Youtube影片，都會對情緒帶來正面嘅幫助。

若然發覺自己幫唔到自己，唔好介意向身邊嘅朋友求助，或者尋求專業人士、心理醫生嘅意見。你絕對可以要求自己嘅家庭醫生作出合適嘅轉介，甚至網上都有唔少免費或者付費嘅網站或者手機應用可以為求助者提供心理上嘅支援，有啲朋友試過都覺好有幫助。天無絕人之路，世上沒有解決不了嘅事情。記住，冬天來了，春天還會遠嗎？幾個月後，又會見到英國最可愛嘅春季。