Bluey全球爆紅價值20億美元？四隻狗狗如何為Disney帶來遺憾？－【收市閒情】千頌C

資料搜集一輪，我就知我有眼不識《Bluey》。呢部講Bluey一家四狗嘅動畫，一早已經大紅大紫。

－據Nielsen數據，2023年美國觀眾睇《Bluey》，時間總計有439億分鐘，相當8.3萬年，係所有串流節目中排第二，只係輸俾美劇《Suits》。
－留意返，《Suits》一集44分鐘，Bluey一集只係8分鐘，兩者集數相約，可想而知Bluey係瘋狂被怒播。
－據市場調查機構Circana，2023年第四季，Bluey貢獻Disney+所有電視節目總播放數，達到29％。
－目前Bluey嘅周邊產品已於全球49個國家或地區推出，故事書已賣出2000萬本，並翻譯成超過20種語言；今年仲會喺出生地澳洲開埋主題景點。
－據彭博引述專家估算，《Bluey》呢個品牌，已經值20億美金。

到底《Bluey》憑咩，可以可以撐住Disney+電視節目三份之一嘅流量？Bluey喺2018年澳洲推出，由Joe Brumm創作，故事講牧牛犬家庭的故事，一家四口，主角係Bluey，佢妹係Bingo。內容主要係講小朋友生活面對嘅問題，同埋父母點樣應對呢啲煩惱，selling point係溫情，大人、小朋友各自都會搵到共鳴。比較特別嘅係，動畫會提到抑鬱、不孕等唔係兒童節目唔應該出現嘅主題，但動畫處理得幾好，唔會太沉重，點到即止。我會形容呢部動畫，為有啲似《小丸子》，都係講日常鎖事，搞笑之餘但又有啲溫馨。於是，成功俘虜大人小朋友嘅心。

《Bluey》咁受歡迎，Disney當然會睇中呢舊肥豬肉，不過，佢想搖呢棵搖錢機，都要排吓隊。Bluey由澳洲一間小型動畫公司Ludo Studio製作及擁有，之後成功搵到澳洲ABC及英國BBC合作，第一季投資咗600萬澳元，之後BBC更加簽咗張contract，買斷澳洲以外嘅發行權及版權。《Bluey》助攻下，令BBC旗下BBC Studios，去年收入首次突破20億英鎊；預算去到2028年收入會double up。

至於Disney同《Bluey》嘅關係呢？Disney於2019年由BBC手上買到播放權，之後當然就極受歡迎！據彭博，當年Disney有機會由BBC手上買埋商品同主題公園版權，後來決定放棄，依家睇返，對Disney來講當然揼春。事實上，Disney同製作公司合作上，都唔係冇磨擦。話說Disney Junior所有節目上，過去幾乎冇出現過「poop」（便便）呢個字。不過，《Bluey》動畫就成日提到poop，於是Disney就會剪一個冇屎嘅乾淨版出街，呢個動作令到《Bluey》之父同Ludo都好嬲，大鬧「I hated it.」。不過去到動畫第三季，由於動畫聲勢太勁，令Disney放棄「冇屎」嘅堅持，將所有未消毒版本都播埋出街。

睇返迪士尼業績，今年第二季盈轉虧，蝕2000萬美元；其中Disney+訂閱情況差，訂閱總數1.536億戶，低於預期的1.557億戶。串流影視業務收入增12%至61.88億美元，但都繼續蝕錢，上季經營虧損1800萬美元，去年同期蝕6.6億美元。客觀來講，Marvals都已經俾Disney玩爛咗，你知我知Disney都知，CEO Bob Iger最新講明Marvels減產，未來每年唔會推出超過三部電影及兩部電視劇。至於Bluey，已經完咗三季，今年6月會有20集迷你劇出街，睇來長做長有。喺未搵到新方向前，Bluey嘅商機又擺喺眼前，難怪彭博引述消息指，Disney已重覆考慮要買斷《Bluey》。

最後補充一句，其實香港迪士尼都連蝕8年，但Bob Iger喺今個月業績電話會議上講到：「Strong international parks growth was driven by Hong Kong Disneyland Resort」（上季樂園經營收入表年升13％。）令我有啲好奇今年香港迪士尼業績會點。

千頌C

https://www.facebook.com/winbigwok
https://www.instagram.com/chincongc
bit.ly/ChincongC