中銀大廈霓虹熄了？5000支綑邊霓虹燈已拆 2025年全換LED 燈－【收市閒情】千頌C

中銀大廈由建築大師貝聿銘設計，自1990年5月正式啟用，成為香港地標之一。去到夜晚，大廈就用霓虹燈幫大廈綑邊，勾返成個立體輪廓出嚟，老實講，係好有型，更加可以講係香港夜景signature嘅一部份。

當年呢個霓虹燈project，係由香港第二代霓虹燈匠胡智楷師傅出品。胡師傅依家係香港碩果僅存霓虹燈師傅之一，電影《燈火闌珊》霓虹技術顧問就係佢啦。睇返佢以前嘅訪問，佢當年用幾個月時間，先做好中銀外牆三角形霓虹燈。

不過，霓虹燈都有熄燈嘅一日。最近內地有YTber訪問胡師傅時就講到，中銀大廈5000支霓虹燈管，1月會換成LED燈，咁同時代表呢位老師傅喺香港製作嘅大型霓虹燈項目，就會全部消失。我今晚就特登去睇吓中銀換燈換成點，估計下半部分有啲應該已經換咗，因為啲燈顏色同以前有啲唔同，上半部仲未有燈。

好多人都會為霓虹燈行業式微而嘆息，不過睇胡師傅訪問，佢反而睇得好化，佢就話：「冇一樣嘢可以長久做落去嘅，就算LED出現搶咗好多生意，我又唔會覺得好唔開心。因為每個人都面對變化，變化係永遠都會出現嘅。」

以成本計，香港霓虹燈招牌逐漸消失導呢個趨勢，可以話係不可逆轉。雖然要退場，但要多謝霓虹燈、多謝有呢批霓虹燈師傅，曾經為香港帶來「東方之珠」呢個咁靚嘅外號

同樣地，時至年尾，過去一年是好是壞都好，我哋都要多謝自己過去嘅經歷。就好似胡師傅話齋，變幻原是永恆，但只要擁抱變化，每一段經歷，都係迎接新開始嘅準備。新一年，大家加油啦！！！💪🏻💪🏻💪🏻💪🏻

千頌C
https://www.facebook.com/winbigwok
https://www.instagram.com/chincongc
bit.ly/ChincongC