倫敦係咪罪惡之城？有哪些罪案是本地人也會小心注意？

我哋嚟咗倫敦冇幾耐，已經有本地人提醒我哋，响巿中心人多擠迫嘅地方要小心財物，特別係手機，最好唔好一路行一路掛住睇手機，唔理身邊嘅環境，因為歹徒有機會踩住電動滑板車或者駕住電單車搶手機，搶完之後馬上逃之夭夭。

以下兩件事件分別係我哋自己同身邊朋友嘅親身經歷。有一次我哋同幾個新相識嘅朋友一齊去唐人街食飯，食完飯一齊去買珍珠奶茶。奶茶舖外面迫滿咗輪候奶茶嘅客人。就响等等下之際，其中一個朋友突然大叫：「大鑊！唔見咗手機！」我哋幾個你眼望我眼，又望吓身邊嘅人，再叫呢位朋友試下慢慢搵清楚，最後都係發覺搵唔到，估計好大機會係佢將手機放咗响褸袋，但唔知幾時俾附近嘅扒手偷咗。事後呢位朋友雖然有去報案，不過响茫茫人海裡搵到個賊嘅機會係近乎零，因為有人話過，响倫敦每六秒就唔見一部手機……

另一次我哋一班朋友約埋响COVENT GARDEN行街襯熱鬧。去過呢度嘅朋友都知嗰度每逢周末假日都相當多人，尤其係啲小攤檔周圍，人多嘅程度可以媲美旺角女人街。嗰次咁啱我哋响班Friend之中行最尾，呢個時候有人响後面不停咁細細力推我老婆背脊，又用啲唔清唔楚嘅英文叫佢行快啲。由於我哋想慢慢行逐間檔口睇吓嘢，加上其實前面太迫人想快都快唔到，於是我就嘗試叫老婆行埋一邊，俾呢條茂利行先。我見呢個男人好鬼高大，皮膚黑黑實實，唔似本地人(似係南歐或者東歐人)，衣著打扮非常誇張矚目，戴副Gucci太陽眼鏡，似土豪遊客多過似賊，所以對佢亦冇乜戒心。點知我哋兩個諗住行埋一邊俾佢過，佢個口唸唸有詞，又繼續跟响後面點都唔過。於是我地唯有堅持企响原地唔郁，最後佢先死死地氣行咗去。

後來我哋覺得呢個男人好大機會係賊，因為我哋會合返前面嘅朋友之後，見到其中一個男性朋友個背囊竟然無端端打開咗。好在佢自己將啲財物收到好埋，檢查後發現並無損失。後來我哋發現呢扒手特別鐘意對背包客落手，因為有一次到我自己一個响白金漢宮附近遊覽，又係用背囊，仲要拎住手機周圍影相，額頭好以鑿住「遊客」兩個字。行咗一陣又係突然間發現個背囊無啦啦打開咗。今次又係咁好彩，都係冇財物損失。因為，其實我哋啲本地人已經慣咗電子消費，冇帶錢出街好耐。而呢類扒手針對嘅，係好多現金响身嘅遊客。

大家唔好以為响人多嘅旺區先至多賊，我哋有個朋友响名錶店做SALES，佢嘅客人就親身經歷過日光日白响名店區俾人拑住搶走手上嘅名錶，人無事，但損失超過五位數字(英鎊)。

最近BBC有條紀錄片《Hunting the Rolex Rippers》正正就係以呢類劫案為主題，個記者好大膽咁深入虎穴接觸並訪問咗一個靠呢類劫案搵食嘅團夥，發現佢哋嘅行劫手法係咁嘅：首先團夥會派出一個其貌不揚、普通師奶樣嘅「Spotter」响名店區放線，佢會透過問路、問時間，或者任何方式嘗試接近目標人物，目的係近距離確認目標手上果隻係值錢嘅名錶，然後Spotter就會將目標人物嘅外貌特徵同行踪話俾响附近隱藏身份嘅主腦知，繼而主腦就會派幾個未成年嘅蒙面廢青，行埋去目標人物度拑住搶，得手後將名錶响安全地點交俾主腦，最後收錢散水。

報道指出，响2023年上半年倫敦警察就收到大約3,190宗失錶劫案嘅舉報，响2022年總共有價值超過5,000萬英鎊嘅名錶响倫敦被劫。聽完之後，我哋冇再戴過勞力士出街，Seiko同Casio至係我哋最好嘅朋友……

正所謂錢財身外物，倫敦最得人驚嘅當然唔係打劫，而係近年經常出現嘅「Stabbing」，即係攞刀捅人。呢類罪案幾乎响每個區都有機會發生，每隔三兩星期就有一宗見報，而且幾乎俾人捅親嗰個都死，好少機會大步攬過。呢類罪案嘅特別之處係，通常行兇者都唔係為咗求財，而受害人多數都係年輕人，所以我個人估計好多時應該係同仇視同報復有關。就好似美國常見嘅槍擊案咁，英國人唔用手槍，就改用刀仔。

講咗咁多例子，你問我哋會唔會覺得倫敦好唔安全？To be honest，如果响冬天早天黑果幾個月，一個人响巿中心、東區、特別旺或者特別靜嘅區出現，的確係要即時提高警剔。

咁我舉咁多真實例子出嚟又係咪想要唱衰英國呢？No，因為我哋一向都話倫敦其實係最唔似英國嘅地方，倫敦以外好多二、三線城巿同埋鄉郊其實治安都非常好，我哋有朋友住响鄉下地區甚至可以唔使鎖大門瞓覺。我哋只會講，世界上除咗少數遍佈天眼嘅警察城巿之外，多數人口稠密嘅大城巿嘅罪案率都會偏高，倫敦自不例外。

如果治安係你非常關心嘅一環的話，我哋的確會建議你避開倫敦，揀一個比較富裕、寧靜嘅小城或者小鎮落腳、定居，又或者响搵地方搬屋之前，上呢個網站：https://streetcheck.co.uk/，輸入你嘅目標地點Post code，掌握好當地嘅罪案率、罪案類型，同罪案黑點分佈，咁就最穩陣喇！