【英國移民生活分享】搶手機案極常見！英國常見罪案破案率低令罪案變本加厲

呢套紀錄片主要針對本地發生嘅幾種常見罪案，包括爆竊、搶劫、搶手機、偷車、偷單車。Channel 4記者發現，大部份發生過嘅呢幾類案件，最後都係冇破到案，好多甚至從來冇偵查過，令到犯人可以繼續逍遙法外，甚至變本加厲。

先唔好講最常見嘅搶手機，其他幾類型罪案我哋身邊都有朋友好不幸咁親身經歷過。其中朋友A住响舒梨郡一個好寧靜、好富庶嘅小鎮，因為佢住嘅單位响地下，深夜熟睡嗰時就俾賊人由窗門爬入屋偷竊，雖然只係俾人偷咗手提電腦同小量現金，但案件發生後一直猶有餘悸，唔敢再住返地下單位。

朋友B住响北倫敦一個治安唔錯嘅地區，習慣每日踩住佢部千幾鎊嘅靚單車去附近超巿買嘢，有一次佢只係入咗超巿15分鐘，出嚟後單車已經不翼而飛。至於朋友C就南住响南倫敦嘅半獨立屋，有一晚俾賊人入屋偷竊，不過賊人嘅目標唔係錢，佢哋拎咗屋主大量手袋、衣服等私人物件走，原來目標係入面條遙控車匙。

結果賊人成功開走咗架又新又靚嘅寶馬，然後再將朋友C嘅其他私人物品，包括銀包同證件掉晒入附近High Street嘅垃圾筒。不幸中之大幸，朋友C最後都經過街坊群組搵返大部份失物，而失竊汽車亦都獲得保險公司全額賠償。

Channel 4呢套紀錄片都cover咗以上部件罪案，甚至成功「放蛇」搵到案件嘅的原兇同主謀進行採訪。話說記者將一架裝咗追踪器、價值千幾鎊嘅名廠單車鎖响劍橋巿嘅一支電燈柱上面，然後用監控鏡頭實時監視，結果只係放咗半晚，單車已經俾一個賊人成功偷走。

雖然記者即時知道被偷單車嘅所在地，但因為已經係深夜，所以諗住第二朝至出發去搵返架單車。點知第二朝佢再睇吓個追踪器，發現單車已經離閧咗劍橋，去咗15英哩以外嘅一個小鎮入面。與此同時，佢更加發現架單車已經俾人擺咗上網以幾百英鎊價錢出售。

之後記者假裝成買家登門造訪，發現賣家對被竊單車嘅來歷似乎毫不知情，佢只係用咗百幾鎊從一啲廢青手上買咗呢部名廠單車嚟轉售圖利。

另外針對倫敦無日無之嘅手機搶劫案，記者更加發現大部份响倫敦俾人偷走嘅手機，無論係iPhone 13、14、15(嗰時未出16)，最終嘅目的地竟然係深圳華強北！

最利害係呢位記者竟然有方法接觸到一個响華強北接收呢啲手機嘅商人，商人表示每個月經佢處理嘅被盜手機數目不計其數，無論蘋果嘅加密技術幾咁先進，佢哋都有辦法將手機解鎖再轉售圖利。

經佢粗略估計，每年經過非法途徑由世界各地運嚟中國嘅手機數目達到1億部，由於當中涉及太多集團同組織嘅利益，佢都只能夠透露住咁多。

另外，記者仲接觸到一個响倫敦居住嘅中國籍男子，原來佢就係其中一個手機搶劫團夥嘅中間人。呢個蒙住面接受採訪嘅男子表示，佢每部偷返嚟嘅iPhone 13、14可以幫佢賺到100至150鎊，如果係iPhone 15 Pro更加可以賺到250鎊，所以佢一個月閒閒地都賺到12,000至15,000鎊，真係好過去搶！

最後佢話，經佢偷返嚟嘅手機都會經過中國快遞公司寄返深圳解鎖繼而轉售，至於用邊間快遞佢就冇講喇。大家只要粗略咁計吓條數，呢度講緊係每年幾百億人民幣嘅黑巿交易額，雖然我哋唔識呢個Channel 4嘅調查記者，但係轉述出嚟都驚驚地呀！

英國係一個自由開放嘅國家，倫敦係一個國際化嘅城巿，响度出現一啲跨國嘅罪案真係一啲都唔奇，作為一個小市民，唔想新買嘅iPhone 16轉頭又被送返深圳，出街真係好小心！