Jellycat是甚麼？拆解Jellycat業績賣公仔年收20億！全球爆紅有甚麼魔法？－【收市閒情】千頌C

雖然Jellycat唔係上市公司，但其實根據英國監管機構要求，佢都要公開佢財務報表，早排佢公佈2023全年業績。至2023年12月底，全年收入2億英鎊，按年增長37%；全年稅前收入6721萬英鎊，較2022年增加24％。換個匯率睇，即係一年單靠賣毛公仔，做20億港紙生意，稅前賺6.6億港紙。

嘩！佢top line同埋bottom line增幅好勁！唉呀，算慢咗架啦，2022年呢兩粒數，即係收入及稅前盈利增長，分別係飆72％及86％。

最新財報就提到，依家公司經歷高速增長期，收入好大比例係來自出口。近幾年，公司喺幾個主要market，即係歐洲、北美、亞洲錄持續增長。睇公司網頁介紹，品牌已進軍全球77個國家。

老實講，佢啲公仔賣得唔平，咁佢食水有幾深？2023毛利率65％左右，用bottom line睇，扣埋稅，你每俾10蚊佢，佢就賺你2.6元。你問我，其實冇話食水深唔深，啲公仔真係整得靚，仲要成功吸到fans，食水再深都會有人買，包括在下。

呢個品牌，最叻係將世界所有嘅嘢，都加眼仔嘴仔手仔腳仔俾佢，而又加得好得意，包括西蘭花、牛油果、Pizza、牛角包等。要講佢發跡史，就要由25年前講起，品牌1999年成立，由Thomas Gatacre及William Gatacre 兩兄弟，於英國倫敦成立。呢個brand標榜以頂級短絨毛製作，一開初係以BB、小朋友做target market。

到2015年，英皇室發新相，其中一張相，係當時仲係得7個月大嘅夏洛特公主，就係玩緊Jellycat Fuddlewuddle狗仔。有皇室加持，奠定呢個brand英國高端玩具品牌地位。

不過要講到香港大紅大紫，都應該真係近一年幾先發生。首先唔少韓星都有入手，好似BLACKPINK Jisoo、Rose、Twice 周子瑜、NewJeans等；然後最勁係佢上年開始有新campaign，先後喺世界各地，包括美國、英國、上海等開「Jellycat CAFÉ」。

呢間cafe係不賣食物，只賣公仔。你同佢落order點餐，例如你叫一個cake嘅公仔，waiter就會問你「要唔要cream？」「多啲定少少？」然後扮唧cream，再認真放入外賣盒，儀式感100分。簡單講，就係開間實體店，請埋人同你玩小朋友煮飯仔。

結果呢類「外賣片」喺網絡上大紅大紫，TikTok、Reels勁多，再去到小紅書吹奏，進一步令Jellycat紅上加紅。更絕嘅係，啲character賣到咁上下會停產架！！（官方公佈係用「退休」呢個字眼）limited supply，即係有二手炒價啦，有炒價，就令一手市場更搶手。目前已經停產嘅傷心水煮蛋，以及迷糊水煮蛋，原本只係二百幾蚊，依家一隻蛋二手價破千。

認真，我兩年幾前有小朋友先識Jellycat，當時香港都未好紅。不過一買就愛上，to be accurate，係我一買俾個仔後我就愛上。雖然佢貴，但係佢有個好，係啲BB點咬，佢都唔會甩毛。更重要係，佢啲公仔真係好得意。我屋企有一隻公仔，係一碗拉麵，你諗吓，無啦啦喺碗拉麵加眼仔嘴仔手仔腳仔，勁得意！

買嘅人開心，賣嘅人更開心。根據2023年業績，公司向股東派息5800萬鎊（5.7億港元），比2022年嘅900萬鎊高5倍。

唔少人問泡泡瑪特嘅LABUBU勁啲，定係Jellycat勁啲。據泡泡瑪特2023年全年業績，THE MONSTERS（LABUBU）全年收入3.7億人民幣，折合3.9億港元，明顯同Jellycat一年20億有好大距離。

至於2024年，LABUBU因為Blackpink LISA爆紅，呢個IP今年上半年，已做6.27億人民幣生意，相當6.7億港紙，粗略估算全年最少14億。不過，呢個數仍少過Jellycat 2023全年收入。

千頌C
https://www.facebook.com/winbigwok
https://www.instagram.com/chincongc
bit.ly/ChincongC