移民英國生活總會遇上歧視問題，但實際情況又到底是否嚴重？

首先歧視情況嘅嚴重性固然會因為好多不同因素包括居住點、年齡層、受教育水平等而有所差異。例如响倫敦入面，外來人口比例極高，無論响購買區、旅遊區、地鐵，都經常見到唔同膚色嘅人，又會聽到唔到國家嘅語言，就算住响倫敦人面嘅英國本地人，好多都係嚟自倫敦以外嘅唔同地方，有啲甚至遠至蘇格蘭、威爾斯同北愛。

所以倫敦人已經好習慣同其他膚色、種族、文化背景嘅人和諧共處，故此歧視嘅問題可以話一啲都唔明顯。我哋有朋友响華人公司同意大利公司返工，職場入面聽廣東話同意大利文嘅機會仲多過英文，英國本地人反而成為咗少數族裔。更加唔好講倫敦果幾間好出名嘅名牌大學，裡面亞裔同華裔嘅學生所佔比例極高，作為香港人應該會驚俾LDS岐視多啲。

至於响倫敦以外一啲主要嘅英國本土白人聚居地，例如英格蘭東南部同西南部，岐視問題可能就會相對明顯。記得大約兩年前有一次我哋去東南部嘅肯特郡旅行，當時疫情仲未退卻，但英國已經冇乜人會响公眾地方戴口罩，而我哋啲香港人仲係好驚青，去邊度都好似係高度戒備咁，又口罩又搓手液，所以響公眾地方就變得好鬼突出。

嗰次响一個小鎮嘅大街上散步，的確有幾個Moment係會覺得周圍嘅人啲目光係怪怪地，亦都聽到身邊嘅車無端端對住我哋響咹。我哋事後諗返成件事其實都好理解，首先我哋嘅華人面孔响當地出現的確係頗突出，加上一身打扮難免會使某啲人聯想起病毒嘅源頭，咁唯有當係硬食咗佢算啦。

另外一個例子，我哋有朋友個仔响倫敦一間中學讀書，學校嘅足球隊有一次同區外某學校對壘。朋友學校嘅有色人種學生可謂佔咗大多數，其中又以印度裔嘅比例最多，所以足球隊幾乎清一色係印度裔面孔，至於對手學校就啱啱好相反，清一色係白人。

結果响比賽期間，朋友學校嘅學生竟聽到對方好多帶有岐視含意嘅不友善說話，例如叫對方快啲返去自己國家，或者快啲返屋企食咖喱等等等等。事件响朋友學校嘅家長谷引起咗好大迴響，有家長促請校方要嚴正處理呢次事件，甚至要去信涉事嘅學校作出投訴。

而另一個移英香港人家庭，就唔小心咁捲入咗種族岐視嘅風波。話說呢位朋友嘅囝囝當時只係啱啱夠年齡入讀本地小學，而佢囝囝可能一向都比較活潑同多嘴，有一次响學校好天真咁對黑人老師講咗句，「You look like a monkey！」，之後竟然惹來軒然大波，寫手冊、見家長等都不在話下，校方仲要同呢個小朋友嘅父母講，會將呢件事件寫入小朋友嘅「file」度！

朋友同我哋都唔知呢個係咩「file」，只係知道呢個file係會一直咁跟住呢個小朋友長大，於是朋友知道事關重大，最後花咗好多時間同心力同校方交涉先至能夠將事件平息。

總括嚟講，歧視雖然係人之常情，响英國好多正式場合卻係大忌，甚至係罪行，即係可以諗，唔可以開口講，所以英超聯嘅口號都係「No Room For Racism」，而過去英國嘅王室成員亦多次因為講錯咗一兩句含有歧視成份嘅說話，而搞到成身蟻。

據統計，目前英國大約有600萬，即係約9%人口為非英國籍，還未計算一啲持雙重國籍，以及非英國出生但早已入籍英國嘅居民。無論响學校或者職場，其實唔同膚色、種族，甚至國籍嘅人都好常見，年輕一輩嘅本地人更好大機會係响一個種族多元嘅環境下長大，而我哋嘅細路呢兩年亦都識咗唔少唔同膚色嘅好朋友。希望以上例子可以消除你哋對呢個問題嘅疑慮。