香港三項鐵人代表黃子圖｜從跑步中領悟的學習

要玩三項鐵人，就要精於跑步、遊水及單車。沒有人是一開始就精於三個項目，事實上，黃子圖是從游泳開始的。當然，跑步這回事，早早就於他孩童時間已經融入他的生活。「我記得仲係細路仔嘅時候，成日喺公園同朋友玩捉人遊戲，嗰種「你追我跑」嘅感覺，可能就係嗰陣時種下咗對跑步嘅喜愛。」黃子圖如是說。

但黃子圖到底是如何正式開始玩三鐵呢？黃子圖回憶道：「喺一次水運會度，偶然見到有水陸兩項運動比賽嘅宣傳，就嘗試咗參加，結果跑步項目攞咗第一名。嗰刻我覺得呢件事好好玩，於是試埋三項鐵人。慢慢，呢個運動就成為咗我嘅生活重心。」一次的偶然，就改變了一個人的一生。

對於一個運動員而言，或者跑步可能可以很功能性，就是訓練與比賽，但是對於黃子圖來說，卻不單止是一個運動：「跑步仲係一個可以讓我感受自由嘅時刻。夜晚跑步聽住歌，吹住風，感覺成個空間都屬於自己，可以完全放空。當然，訓練嗰陣需要集中精神完成教練設定嘅程序，但係我最享受嘅，係一啲自己跑嘅輕鬆時段，可以真正同自己對話，感受運動嘅純粹快樂。」

但作為一位運動員，參加比賽永遠都是核心之一，而且攞獎更加是目標之一，黃子圖也絕對認同，但他認為更加重要的是，比賽背後對人生的啟發：「運動令我更加明白堅持同失敗嘅意義。好似我喺亞運前參加世界錦標賽嗰次，單車項目因為撞車而未能完成比賽，嗰刻真係好挫敗，因為我知道自己當時嘅狀態係最好嘅。但係呢啲經歷教曉我，失敗係運動員必經嘅一部分，重點係點樣從中學習，點樣重新站起身。」

「受傷」這回事，不限於專業運動員，你或我身邊練跑的人，十個九個都有傷患在身，但是否要每次都帶傷上陣，以為自己是戴志偉？黃子圖指出運動員受傷是非常常見。：「我曾經試過膝蓋受傷，斷斷續續搞咗成年，但係我學識咗唔能夠心急。傷病期間，最重要係讓身體慢慢康復，同時保持心態積極。心理壓力方面，我學咗點樣去接受失敗同容許自己唔開心。每個人都需要時間去消化情緒，然後再重新出發。」

黃子圖更有建議給大家：「我會建議大家要學識聽自己身體嘅聲音，唔好因為想短期進步而過份操練。比賽前兩個星期，調整好狀態係最重要嘅，唔需要再谷盡，反而應該專注喺比賽嘅節奏同策略。最緊要嘅係放鬆心態，記住比賽只係一部分，唔係人生嘅全部。比賽嘅目標係超越自己，而唔係同其他人比較。享受運動本身嘅樂趣，比成績更加重要。」