預算案發債1200億 是「禍害子孫」？還是為未來買機會？－【收市閒情】千頌C

如果依家問你，「香港最主要收入來源係咩呀？」好多人可能會答，「利得稅啦…賣地收入啦…」全中！我統計咗自1989年政府數據，自美國實施量化寬鬆（QE）之後，即係2010財年起打後十二年，賣地可以話係香港收入第二大命脈，每年貢獻香港總收入，最少都有14％（你想問第一大命脈係咩？係利得稅）。

最巔峰（or癲瘋）嘅一年，就要數到2017財年，當年全年賣地收入高達1648億元；多得海航高價搶啟德地，又有恒地買中環美利道地皮起個吹氣波波The Henderson，令賣地為當年香港庫房總收入，貢獻比例破紀錄高達27％。一年嘅賣地收入，總額至今仍係紀錄高位，亦係第一次賣地成為香港庫房第一大收入來源。同時，賣地收入亦帶挈令香港當年嘅盈餘，達到1489億元，數字至今仍然係歷史高位。

好啦，問題嚟啦，自2022財年開始，賣地收入好明顯急跌，銀碼上按年跌一半去到699億；到2023財年，更加係流標之年，政府、港鐵及市建局推9個項目，有6個流標。全年賣地收入得返194億，係2008年財年以來新低。呢個銀碼，全年貢獻庫房總收入只係得3.5％，呢個比例，係自沙士、2003財年以來新低；講銀碼，仲少過今年政府收到嘅差餉，差餉都有283億呀。

果，全年赤字1016億，呢個數字美化咗啦，因為入面計埋725億元發債收入，撇除發債影響，赤字係1733億。咁上年係差，希望在今年呀嘛。政府點project今年嘅數呢？陳茂波都只係預期全年賣地收入得330億，即係只能夠貢獻政府全年總收入5％多啲，全年赤字480億，撇除發債影響，赤字係1438億。有咩啟示？就係政府對後市都非常審慎。

過去十幾年來，香港一直靠地產支撐住庫房收入；咁呢個支柱撐唔到啦，咁你搵咩去補返呢1000億收入？學曾俊華話齋「搞標準稅率設兩級制同住宅物業累進差餉，兩樣加埋一年增加嘅收入都唔夠 20 億，我哋依家面對緊係千幾億嘅債，呢啲根本係杯水車薪。」睇番政府數據，唐英年2004年發嘅債，2019年已還清，之後波叔年年發綠債、銀債，呢度接近2000億，再加上新1200億，total 3000幾億。預算案又提到，計劃未來五年，每年發債約 950 億至 1350 億元。

陳茂波記者會上講過，「我哋發嘅債都是比較短期，部分會償還其他到期的債券，所以總括來講，喺呢幾年嘅發債中，平均來講，還咗一啲到期款項後，每年用的只係幾百億元」。睇政府公佈數字，今年發完1200億之後，庫房要拎242億去還舊債，呢個數字已係史上新高。睇埋政府未來五年預算，去到2028財年，要還債1079億。

新稅源未開拓，咁就要靠香港自身實力，去搵新產業，搵新增長動力。依家全球將未來聚焦AI，更加稱之為「第四次工業革命」，上年先講ChatGPT，今年已經講緊SORA，下半年又唔知會有咩新發展震撼大家。可惜嘅係…香港連official地用ChatGPT都冇份。然後我哋暫時見到嘅刺激經濟嘅手段，就係撤辣招、放煙花、派雪糕……到底發債之後換取嘅銀根空間，可以幫我哋為未來投資去邊度？

預算案列明，發債所得資金唔會用於支付政府經常開支，而係推動債券市場發展，推動綠色及可持續發展和基建項目。陳茂波又強調，會維持政府借貸於穩健水平，預計 24/25 至 28/29 年度期間，政府債務佔 GDP比率將介乎約 9% 至 13%，「遠低於大部分其他先進經濟體」。根據《明報》引述政府消息人士表示，2024/25年度發債1200億元，約一半、即500多億至600多億元用作償還舊債，餘下用作基建開支，如北部都會區。

前中國大好友、摩根士丹利前首席經濟學家羅奇早前在《金融時報》撰文提及「香港玩完論」，我就好認同「反駁隊成員」馬時亨篇反駁文章嘅，佢就話只要香港可以力保7大優勢，就「必再興盛」！7個特徵包括：
（1）保持金融穩定，並強化其金融中心的五大支柱，包括股市、債巿、銀行、保險及資產管理；
（2）維持司法獨立制度及國際化的普通法法律體制；
（3）保持廉潔高效的政府；
（4）保持資本和人員的自由流動；
（5）維持訊息自由流通的互聯網；
（6）繼續發展優良高質的普及基礎及高等教育；
（7）構建多元的海外專業人才庫。

認真，我真係好同意佢嘅講法，若呢7個特徵可以持續的話，「加上特區政府招商引資及人才政策能成功，香港經濟必能再度興盛，遑論『玩完』」！

（以上評論為作者個人意見，並不代表本網站立場。投資者須注意投資涉及風險，價格可升可跌甚至變成毫無價值。投資者在作出任何投資決定前，應詳細閱讀有關之風險披露聲明及相關文件。）