特朗普VS朱克伯格|回帶睇兩人恩怨情仇 －【收市閒情】千頌C

講Trump同Mark嘅恩怨情仇，就要由2020年，上屆總統大選講起。當時共和黨人已係咁批評 Meta， 壓低拜登負面新聞嘅reach，特別係有關佢個仔亨特嘅負面報道。到2021年1月，國會山莊發生騷亂，Meta直接 block 特朗普acc，佢當然嬲過火屎。

Trump就梗係有將阿Mark mark喺小器簿！上年大選前幾個月，Trump就話，「一旦當選，我會用前所未有嘅力度，去追捕『選舉詐騙者』，佢哋一定有排坐監。」更加點名：「DON’T DO IT! ZUCKERBUCKS, be careful!」

去到上年9月，Trump出咗本書，書入面就再警告Mark：「我哋會望實佢，如果佢今次再做任何犯法嘢，佢餘生都要喺監獄度過。」

Mark知Trump唔係講笑，所以上年7月，就開始「相嗌唔好口，伸出友誼之手」嘅態度，公佈將Trump本來被壓reach壓到癲嘅FB、IG acc，冇限制地全面開通。

另外上年7月特朗普中槍後，Mark Zuck已feel到勢色唔對，要企出來做返啲嘢。

於是中槍消息一出，佢就出來講，「見到Trump被槍擊後，佢喺美國國旗前振臂高呼，呢個畫面係我人生見過最有型（badass）嘅事……認真，作為美國人，真係好難唔俾佢奮戰到底嘅精神動容。我相信咁解釋到，點解咁多人喜歡呢個人。」wow！態度已180度變。

去到Trump篤定當選，Mark就似農曆年前嘅看更一樣，瘋狂做實事去討好Trump！

Trump當選後，Mark就去咗佢屋企，亦即依家有「冬季白宮」之稱，位於佛羅里達州嘅海湖莊園（Mar-a-Lago），兩個人食咗餐飯。之後Mark就向Trump就職基金，捐100萬美元，佢以前未試過捐架，係佢嘅第一次。

之後佢請Trump啲朋友加入meta。上星期委任共和黨中堅分子 Joel Kaplan，接替英國前副首相 Nick Clegg，負責Meta 全球公共事務工作。

尋日又公佈，委任一位人兄Dana White，成為Meta 董事。呢位「白先生」係Trump資深啦啦隊，過去三屆都堅定支持侵。

順帶一提，呢位「白先生」同Mark都有共同興趣！事緣「白先生」係全球最頂級 MMA 組織「終極格鬥冠軍賽（UFC）」主席。有幾頂級呢？簡單比喻，籃球界最top聯賽就NBA，而UFC就係MMA界嘅NBA。

講多無謂，行動最實際！最新一大動作係，Meta 取消「第三方事實查證機制」（Fact-checkers），改採類似Elon Musk旗下 X 嘅「社群筆記」(Community Notes) 模式。

簡單解釋，以前Meta會請外判，幫佢哋scan平台上嘅post有冇流料。不過，早喺2016年推Fact-checkers機制時，共和黨，包括特朗普，已經批評機制存有偏見。一直都唔gur，去到Trump就快上任，就拿拿聲 cut 咗佢，改為透過用戶協助，為隻post加上footnote，協助核實資訊。

公司公佈呢項措施，最精彩係聲明措辭。相信大家都仲記得，上年Mark同Elon差啲要埋身肉博，打返場MMA，當然最後得個噏字。依家 Elon 成為特朗普身邊大紅人，Mark 就係大大頂高帽笠落去Elon Musk度。

Meta 聲明入面就大讚 X 嘅方法好好，「我哋已經見到呢個方法，喺 X 上面係奏效。佢哋賦予個community權力，由用戶決定邊啲內容可能具有誤導性，且需要更多背景資訊。而來自各種不同觀點嘅人，共同決定點樣嘅背景資訊，對其他用戶係有幫助。」聲明最後講到具體做法時，非常直接地說，「Just like they do on X」。

最正係Mark自己出咗條片解說，就話「2016年特朗普贏咗總統，當時好多傳媒就話錯誤資訊會如何打擊民主盛盛」，所以當時出於善意，就搞咗Fact-checkers呢壇嘢，回應呢方面concern。不過，「呢班Fact-checkers太politically biased，佢哋做嘅嘢係摧毀大家嘅信任，遠多於建立信心，特別喺美國。」

另外，Meta過去好一段長時間，都係㩒低政治相關post reach，Mark都有解釋，「之前唔推政治post，係因為呢類post令人好大壓力。不過，依家我哋進入新時代啦，收到唔少feedback話想睇到呢方面內容，所以我哋會於FB、IG、Threads派返呢類內容。」

佢又跪低認錯，Meta喺內容政策上有「too many mistakes」，「最近嘅選舉，似乎象徵住一個文化上嘅轉捩點，重新開始重視言論自由」最後再補多句，「會同特朗普總統合作，對抗全球各地的政府。佢哋正針對美國公司，推動加強審查。」

出色出色，一句講晒，就係「唔好意思，之前語氣重咗少少。過去係我唔岩，我唔著。依家新開始，我哋不如重頭再來過啦？」

對於今次Mata政策上改變，有記者就問Trump，Mark係咪回應緊佢坐監嘅威脅，Trump答：probably。