移民英國告别24/7工作模式！從運動中尋回真正生活

雖然英國好少好似香港咁，接連幾日或者成個星期落暴雨(落狗屎嗰種)，而係永遠陰啲陰啲咁落，落一陣又出吓太陽，轉頭又再落過，所以有時就算遇到晴天，去公園行草地都係會成腳泥濘。而我哋亦試過好天去公園踩單車，結果係成架車比泥氹啜實咗，公園咋喎！唔係沼澤喎！所以我哋而家終於知道點解《Peppa Pig》入面啲角色咁鍾意玩泥氹，原來因為呢度啲小朋友係响泥氹入面大嘅！

另一個令人傷心嘅地方係呢度冇乜沙灘。Are you joking? 成個國家俾海岸線包圍住點會冇乜沙灘？首先，呢度大部份地方要去海邊一定冇香港咁方便，閒閒地都要開一兩個鐘頭車，冇車嘅話更加係超級麻煩。就算去到海邊，呢度所謂嘅海灘其實大部份都係由圓卵石構成嘅石灘，加上長年又大風又大浪，基本上係不適宜游水嘅。

至於一啲真正風平浪靜、水清沙幼嘅海灘，地點就會再隔涉啲，而且每逢夏天再撞正假日，就會同香港嘅海灘一樣迫滿晒人。再者，英國天氣真係熱到可以去海灘游水嘅日子，只限於每年熱浪來臨嗰幾個星期，其餘時間啲水都係好凍。冇嘅，真係好鍾意游水，咪當游冬泳囉。

咁至於開心嘅地方呢？我諗多到寫幾篇都寫唔完。首先對於鍾意行山遠足嘅人，呢度可以探索嘅地方數之不盡，有香港人就鍾意挑戰威爾斯、蘇格蘭、英格蘭北部山區、湖區嘅崇山峻嶺，我哋份人Hea啲，認為响屋企附近嘅效野公園或荒地步行已經好滿足。自從裝咗「AllTrails」呢個APP之後，每去到一個新地方，更加可以即時搵到附近嘅遠足路線，因為有埋GPS導航，响陌生地方都唔怕盪失路。

除咗遠足之外，踩單車、帆船、獨木舟、SUP都係我哋好鍾意嘅戶外活動。單車咁普通就唔使講，帆船同獨木舟雖然比較冷門，但英國都好多人玩。兩者比較之下，英國可以玩帆船嘅地方唔多，就算海邊小鎮都唔一定有艇會出租帆船或提供課程，至於獨木舟同SUP就普及得多，因為英國好多城鎮都有河流流經，响河上面玩獨木舟同SUP比响海上面玩安全得多。

最正係你可以自己買隻獨木舟或SUP放响車頂或者車尾箱，然後穿州過省响全國任何一條河上面放船(只需付47鎊年費申請British Canoeing Membership)，甚至由一個鎮划去另一個鎮，中途揀地點扎營，玩法可以話非常之多。

鐘意玩X-Game嘅朋友嚟到英國都會非常之開心，首先MTB嘅路線非常之多，點踩都踩唔晒。滑板場一樣十分常見，幾乎每個住宅區附近都會有個小型滑板場，就算响倫敦巿中心，都有一個叫Southbank Skate Space嘅超正地點，長年熱鬧，高手林立。

再刁鑽啲，想滑雪又點呢？雖然英國因為地勢同氣候關係，除咗蘇格蘭北部之外都冇乜天然滑雪場，但原來向曼城、卡地夫、米爾頓凱恩斯等地都有室內滑雪場，所以我哋識唔少香港人都係過到嚟到英國先至開始滑雪，或者重新Pick up曾經好熱愛嘅滑雪同Snowboard等運動。

講返啲大眾化嘅運動，例如英國國技足球，就更加唔使講，無論係任何年齡層，任何性別，呢度都好多人鍾意踢波。過去响香港要湊齊一隊波友並唔容易，又唔易book場，而我嚟到英國只係頭一個月，就已經有波踢，嗰時連對波boot都未寄到嚟，要嗱嗱臨去Sport Direct買返對，之後落場嘅次數仲密過响香港嗰時

而且呢度嘅香港人波友組織性非常之強，好多球隊都可以keep住每星期常規踢一兩場，然後又有舉辦過分區聯賽。有部份球隊嘅水準十分之高，例如當中最出名嘅Konger FC，球隊已正式參與英國足總轄下的第13級曼城地區聯賽。我哋都好希望佢哋可以一路踢上去，將來可以為香港人响英國爭光。

講咗咁耐，都仲未講到哥爾夫球、攀石、板球、划艇、騎馬、武術、露營等特色運動，所以响英國可以玩嘅運動種類實在非常之多，所有熱愛運動嘅人都會响度搵到自己最大嘅興趣，問題只係自己有冇足夠嘅金錢同時間，同埋你嘅興趣能否得到自己另一半嘅支持(LOL)。有機會再逐一詳談。